É tristi odja agu ta disprinda sem tadju, ta rabida tera ku rotxa, lama ta toma na sidadi, pé na txom, pa kori di kel agu ki sta bai rostu baxu, tristeza na rostu di sidadon, mininus ta txora ku txeia. Txeia ki sta foganu.
N´ta manda nha voto di koraji pa tudu kez ki sta sufri ku ez txuba, ki perdi algun kuza, ki perdi algem, pa poi koraji.
TXUBA DJA BEM
Di ripenti sukuru fitxa.
Nha genti keli e kuze?
E txuba e txuba.
Nha povu e sime,
nos sorti ki dja txiga.
Nu pupa nu puba.
O txuba dja bu bem?
Bu trazi kel fixom
ku midju ku batata?
Bu trazi bongolom?
Pa nu kumi ti nu farta?
Es anu nada ka da
so kansera na indjarga.
Nu sukuta nu sukuta
Simenti na txom ta fla muzika
pa nu badja rapikadu.
Nu djuda nu djuda.
Kada um ku si inxada finkadu,
na um kompasu ta rapika.
Forti sabura so sabura.
Sukuru dja fitxa la kelotu lem.
Dja bu sukuta? Txuba dja bem
KI TXUBA
Ta kai ta kamba na greta
ta bem sara frida di seka
so um gotinha ku um strubada
ta due odja tudu pa labada
ta kori ta dixi pa fundu ladera
ta danu um brufinha pa simentera
ironia sta na noz nasom
pa maz kai ka ta serta ku txom
ta fazi poku di noz tamanhu
ta ba kai tudu na osianu
agu nu tem pa tudu ladu
garganta sekom injuriadu
ta panha mar ta poi li dentu
sem sal sem areia so alentu
ta poi koraji konformadu
ta marka viaji kontrariadu
frustadu ku txuba ki ka bem
ta bai riba mar pa torna bem
na bagaji um txuba di koraji
bem luta ku txeia di difikuldadi
ku disgostu o ki txom ka modja
noz mininu nada es ka odja
nem bardolega nem gafanhotu
so um diluviu di bioku, ta fla ka si
o ki nu pidi um gram daroz pa li,
o um kudjer di midju pa la
pa kalma povu, pamo tera nada ka da
DIA DI TXUBA
Dia di txuba pe na posa sapatu modjadu
um dia stragadu ka bu kai na dizisperu
labanta bu luta tra pe di posa troka sapatu
kabesa labantadu bu ta prendi ku bu eru
vida é ka so bom tempu ku sol raganhadu
tambe tem txeu buturperiu ku tempu fitxadu
kapaz di rabidabu pa dentu moda furakom
ku kuzaz ki ta trau di seriu botabu na txom
fika atentu ku kada posa ki ta surji
pamo e maz um obstakulu pa supera
labanta pe di txom ba ta subi
po ka fika paradu la na fundu di ladera
dentu txuba bu tem ki ta modja
sera ki bu ta pasa o bu ta foga
toma senti pamo posa dja sta grandi
finka pe sem medu kaminhu é pa dianti.
DEZ IRMON - PARTI II
Dez irmon labanta tudu djuntu ez fazi djunta mon,
pa sai di um situasom tudu frutu di opresom.
Dez irmon ladu-ladu ninhum é ka igual, sima mai,
sem pai mininus di pikinoti da kabidal sem kai.
Maz grandi tem di kuazi tudu
kodé nada ka tem nem pasadu nem futuru.
Pa kem ki era orfao di pai oji e orgulhu di si mai.
Pobreza kria dizafiu pamo trabadju ka disprezu
kabesa ka sta baziu el ke rikeza ki ta fazi pezu
Dez irmon kada um tem di sel um bom idukasom
um surizu pa kualker stranhu um abilidadi na mon
talentu ki deus danu um beleza natural i melodias pa djudanu
Dez irmon ka tem ki lamenta ma tambe tem oito tem oitenta
um verdadi pa nu spadja di rialidadi ki mesti tadja
Tem pobreza di vida duru ku rikeza fetu manenti na sukuru
Tem bons kabesa ki danu evolusom
ku txeu kabesa lebi ta kre danu na txom
Tem morabeza ke kartom di vizita
ku malvadeza ki sta bira difisil ivita
Onti era sub oji mediu manham nka sabi
Dez irmon é Sintantom é Sonsent é Luzia é Saniklau é Djadsal é Bubista é Djarmai é Santiagu é Djarfogu é Djabraba.
Ami é nhoz fidju nhoz subrinhu
N kre ser sima nhoz ku nhaz irmon ku nhaz primu
Pa nu kaminha ladu-ladu i orgulha noz pai ku noz mai
Sima dez irmon ku maz dez ku maz dez ku maz dez...
Sem comentários:
Enviar um comentário